قصائد للشاعر جاد الله عثمان

بصوت الفنان عزالدين شكرى

مخلوقة أدهشت الخلوق إحتاروا فيها استغربوا
لوشافه غيس ماكان بينظم شعرو ليلى ويكتبو
لوشافه برضو جميل أكيد ماكان بثينه بتعجبو
عينيها شاهره سيوفه عنترة بى سيوفو بترهبو
يظهر نجم عز النهار ضوء الشمس مايحجبو
جدى الغزال وسط الزحام جمع الخلق مايرعبو
يازهرة جملتى الفرع أدخلتى فى أركانو ضو
إتوجهت نسمات شعرنا عشان تغازلو تداعبو
بخت الهواهو يعذبك زى ماهواكى معذبو
بخت السعيد ياحلوة يصبح لى وليداتك أبو
قُت لى تعابيرى أوصفوا أمعجتهن لى أعرضو
قالن ده فات حد الوصف لكن شويه نقربو
عودو الرطيب حبة نسيمه تــلـــعــــــــبو
وجهو المنير لخبت حساب البالقمر كان يحسبو
بسماته تتشالع بروق خلت أعضاى يضاربو
والشامه فوق خدو الشمال شان من عيونا تحجبو
نظرات عيونا آه من عيونا على التصادفو تكهربو
ترسل سهم ياذى القلب بى الفيهو مابتحسبو
ياداب عرفت إنك شمالية الأصل ابو عن أبو
فكرت فى قول الجدود كان لينا دايما يقلدو
قالوا الشمال منبع درر حسدو القدر فى مكسبو
سوى العمل سبب أرتحال لى أهلنا بيهو اتسببو
وإتناثرت درر الشمال ساعت عقيدو أتجاذبو
وعمت جنوب سودنا شرقو ومغربو
يابابنوسه استبشرى ملكة جمالك لقبو
فيك كوكباً يهدى البضلو عنك يضهبو
فيك الفريد يابابنوسه الزيو قط ماأنجبو
الشافه بختو وبختى بى الزمن القليل الفزتبو

ورينى شن وداك تحب زول مابيحب غير نفسو بس
خلاك تبكى وتنتحب فى عتمه مابتــعرف قــبـــــس

حبتو زى غيس زى جميل لكنو جد ماقدرك
حبيو والحب مستحيل فى دنيا كلها معترك
وساويتو بى قامة النخيل ختاك فى اسفل درك
وصبرت عليهو صبرجميل لكن سهابك ودرك

زول ماقدر فى يوم يحس بى حبك العاتى العريض
كلمات حنانك مابتمس وجدانو حتى وكت تفيض
من ريدو قول لى شن ورث غيركل يوم معلول مريض
حلقك من الكوراك يبس جواك ندب نبع الغريض

لوكان غناك لى جبل كان صدع وحنه شــعر
أو كنت غنيت للسهل كان زرعو اينع وازدهر
لو كان غناك للغيث هطل أو للقمر كان جاء وحضر
لكن غناك كان بى أمل لى زول قليبو على حجر

مانحن فى الزمن الخطأ كل حاجه عندنا بى تمن
زمناً مشاعرو محنطه أحلامو ترزح فى الكفن
فوقنا الهموم متوهطه احلى الكلام هو الإندفن
وين نلقى للمكشوف غطا ولمتين نلوليك يامحن

خليهو وأنسى بلاندم مادام نساك واتجاهلك
زولا بكيت علشانو دم مابهمو ريدك يكتلك
خلدتو فى أجمل نغم لكنو قاسى بيجهلك
زول منو إتقطع العشم صدقنى مابستاهلك

سراب

سراب مابيروى للعطشان وهم كضاب اتاريكا
سقيتنى حناضل الحرمان وانا المستنى صافيكا
تصدق عمرى ماأتخيل يموت حتى الضمير فيكا
تجرتق قلبى باللأحزان تخت الحنه فى أيــديكا
هويتك دون بنى الانسان عشقت اخترت عينيكا
متيم قلبى بيك ولهان فى اعمـــاقى خــاتيكـــا
رويتك بى وفاء وتحنان فيض تحنانى راويكا
جزاى خليتو للنسيان نسيتنى وقلبى طاريكا
سراب باريتو كت عشمان سنين باريت خطاويكا
أبيت أرجاك فوق نيران تعود بالشواق ألاقيكا
وراك ضقت العذاب ألوان تزعلنى وأرضيكا
مصيبتى انا كت بيك هيمان قلبنى انا ابقى ساليكا
رجيتك وطالت الازمان ضــيع عمــرى راجيكا
بلاك ماعندى كان حبان متيم قلبى كان بيكا
وكت سال الدمع حتان تصدق مانى باكيكا
وعليك صدقنى ما ندمان ولاباكى ضياع معانيكا
أريت فى غفوت الهجران ضميرك يوم يصحيكا
يذكرك الوداد الكان أمانى الروح أمــــانــيـكــا
حلفت لى كت بالإيمان محال يوم تنسى ماضيكا
مشيت خليت حياتى هوان فراقنا ولاهو هاميكا
قبل يبقى الفراق عنوان أريت تسمعنى أوصيكا
حال الدنيا والأكوان عليكا ويم تكون ليكا
بين هسى وقبيل شتان أكيد زمنك بيوريكا
وكت عاشق وحيد شقيان وقف لى الله شاكيك

الظروف
ك / جادالله عثمان
غ / عزالدين شكري



كـيـفـن ألـم عـلـيـك واتهـنـا مـادام الظروف حكمانى

والـزمـن الـعـنـيـد مـاحـنّ والـدنيا العبوس حارمانى

حـرب الـريـد على مـا ونىّ واسياف الغرام كاتلانى

والـقـلـب الـجـريـح ومعـنىَّ جرحك دموا ينزف تانى

مـاعـزرونى فـيـك اهـلـنـا فـيـك كل الخلـوق لايمانى

مـا أصـلو البحـب فـى زمـنـا فى قانونـا بصبح جانى

قيس لو مرة حبّ وجنا برضي أنا ذيوا روح شقيانى

بـيــن الآهــة بـيــن الأنـه الـشـقـى والعـذاب عنوانى

كـل مـا الـقـمـرى قـوقـا وغـنــا تتهـيج على اشجانى

طـمـبـورنـا وتــر غـنـا احـسـبــوا جـوه فى وجـدانى

راجـى الله الـبـيـدى الجـنة بيك يجمعنى يا المازيانى

اكـون رابـط الـحـرير والحـنة ابشر والخلوق تبعانى

تـبـسـم لى الزهـور فى الجنـة يتبكى السحاب باكانى

شـاركنـى الـفـرح مـا ضـنىّ رشـى وخـدر الـوديـان

في غرامك لي شريك

غناء: عز الدين شكري

ما كت قايل في غرامك لي شريك لكن عرفت وتاني ما برجع اليك
والله كل ما اذكرك اذكر انو معاي شريك
زي ما قليبي انا اشتهاك تلقيهو ايضا مشتهيك
قول لي ذنبي وذنبو ايه ما الناس جميع مفتونة بيك
طماعة يا ست الجمال كيفن تطيري مع جريك
****
ما كل غرام بيظل غرام وما كل بريق سن ابتسام
وماكل خطوة الى الامام احيان بيتعثر مشيل
****
قول لي كيف قلبك سمع يخدع قليب ليك انشرح
ودرتي زول كايس الفرح عيشتي في دنيا الترح
مستني كان تبقيلو غيمة تظلّي من حرا لفح
لكن بقيتيلو الهجير في وادي منو الغيم نزح
****
لو قيس سمع ما كان بجن كان يرثي في حالي يحن
كان يبكي زين دمعاتو تهطل فوق عيونو تغسلن
ما بيرضى انو الغرام يصبح سلع نتبادلن
ورغم الحصل،،،
قلبي الانين لا راضي في نفسو الخداع لا راضي لي غيرو الانين
واحساسو يا ست الجمال ما بيرضى غيرو يعيش حزين
****
وانا اصلي من ريدك قنعت آخر وصية بقولا ليك
ابقي عشرة علي البريدك لا تخيبي ظنو فيك
ابقي زي ليلى وبثينة الغرور لا يعتريك
قالو عاقب الريد عداوة انا من عداوتو بخاف عليك