أشعار شايقيه

[center][ (1)
الهوي يستحيل
للشاعر الكبير إبراهيم أبنعوف
غناء عبد القيوم الشريف

أهواكي غصباً واحتمل ويلات هواكي جنس جنس
أهواكي طوعا كونو انو هواكي لي نبضا وحس
أهواك موهدب بين صراع اللقيا والخوف والوجس
أهواك قدر مكتوب علي كيفن من القدر احترس ؟!
***
وآضيعتي وضيعت فؤادي الفيهو حبك متغرس
ضيعت رسايلك واحرفه المن قلبي ما ختت الطمس
همسات غنيواتنا الزمان الكنا نسمعا بي همس
تحت الشتيله نناجي نحن الريده نحلم بالعرس
***
وآحسرتي وحسرت عيون ذرفت دموعا علي أمس
علي صفاكي وروعتك وحديثك العذب السلس
من بعدك الايام خلن والعيشة فيها بلا نفس
كيفن يضوق طعما ويروق زول فصل الاحزان لبس ؟
***
ذرّت أمانينا الرياح خلت عقاب حظي النحس
في دنيا ما تفرحني يوم فيك تاني ترجع وتتعكس
ارجاها بالحلم الضحوك تظهر لي بالوجه العبس
سدس السعادة تقسما وتحسدني في باقي السدس
***
عزيت سهادي علي المنام شوقرت طرفي الما نعس
بالشوق كويت جرح الفراق مع إنو تب ما بيتلمس
في نيتي اصبر والصبر للمتلي فوق طاقة النفس
إلا الصبر جواي مات يوم ما بقيت بى هواكي احس
***
شايل عذابات السنين والجوة في الجوف يتحبس
واقف اناشد في الديار يا دار انطقي بعد خرس
قالتلي ما نست العهود ماها التبيع الريد بخس
الا الله يفعل ما يريد وابقي انت للتانين درس
***
كان الله فيك قسم النصيب ما كان شقيّ الحال تعس
(2)
أمانه عليك

أمانة عليك .. تخت بالك على الجواك .. علي الحلم البنينا بيــوت
علي السر الدفنّا كـــلام .. تحت وجع الليالي سكوت
أمانة علي .. قبل ترحل مع الأيام .. تشيل حلو الأماني تفــوت
تدس في بير حواسك ريـد ... سقينا وفـا و حــمينا يمـوت
و امانة عليك يظل اسمك حروف من نور علي حيط الفؤاد مشخـوت
***
عهودي معاك أموت واقف... علي باب الهـوى المفتوح
انا البرحل محـل ترحـل ... غمامة عليكا و ين ما تروح
لأنك إنت في الوجـدان ... مشكن بين حــنايا الروح
موسمة بيــك تفاصيلنا ... و مضمدا بي غــناك جروح
تعيش في ذاتي و الذكــرى .. متـل صــفق الشتـي المحتوت
أمانة عليك
سنين الإلفـة بيـناتنا .. قمــر ليلاتك الصـافي
تفاصيل روعتك جــواك ... منابع إحسـاسك الدافـي
حواس خليتا يالمحبـوب .. وراك لا فيـنا لامافي
تموت بي شوقـــك الأفراح ... أمد باللهفة اطــرافي
مكان ما عشت في الأعماق .. هناك كلك عشق مخــتوت
***
اماني وراك مابتنسـاب .. علي طرف العيون دمــعات
امش و انا بالأماني ارجاك .. سنين عمر الجفا الجايـات
و امانة عليك محل تـنزل ... تمــــد حبل المحبة صــلات
يشع نور الوفا الماليـك .. تبق ليل الفراق غــنوات
***
و أمانة عليك
أمانة عليك
تخت بالك علي الجواك ... علي الحلم البنينا بيـوت
(3)
أيام الشباب
كلمات شيخ العشاق عبدالله محمد خير
ــــــ
بعشقك مهما السنين سرقتني أيام الشباب
وأعشقك مهما رؤاي غتاها من تالاك ضباب
وأعشقك مهما يقولو الناس علي جن ومصاب
بعشقك من غير حساب .
***
وليك من غير ما تقول لي سلام بقول أهلا حباب
وأفضل أستناك قدر زمني الرجيتك فيهو
لو قدري أستجاب
كلو عمري نذرتو لي قمري المطول مني غاب
وإنت مهما طال زمانك ..
ليك آخر يا عذاب
***
بعشقك وما شفت أنسان أدمن الريد
ومنو تاب ..
بعشقك وما شفت مجنون ...
غير فقيرو يمسو طاب ..
ألا خايف عمري يكمل ولسه في صبري العقاب
وكت بمد أيامي لولا أن ..
لكل أجل كتاب

([center]4)
بلاد الشوق
للشاعر خالد الباشا
غناء محمد النصري
مشيت بعدك بلاد الشوق
غِشيت في سكـــتي الأطـــــلال
لقيتــك لسّه في الخـــاطــر
وفي مــرقة شمس باكـــر
ملانـبك طول حياتنا جمال
رسومات روعتك تــذكار
علي أبواب بيوت الحـي
محــل تاوّق لـقيتك شوق
مشتت في الشوارع ضي
أماسينا البتسهر بيــك
نجيماتنــا البتشهد لي
وراك لا جفّن الدمعات
ولا أتلاقن رموش عيني
أوّنس بيك نصايص الليل
احجيك دندّ نه وموّال
سألت عليك براي النيل
تميراتنا وعصيفير الهوى الصدّاح
لقيتك في عيون الناس
حنين ساكن القلوب مرتاح
.. بتطلع من حكاياتنا وخيالاتنا
رهاب شايفك بعيد رحراح
أنادي عليك
شموس تمرق من الواطه
قلوب بيضاء وشعاع وصباح
يبق نورك مع الفَجَّاج
علي النخل العزيز وطُوَال
أتاريك.. إنت كلنا بيك
بلاك نحن وبيوتنا شَجَن
تموت سِيرة الفرح نبكيك
نتوه مانلقى لينا وطن
جناينا وضَرانا الفوق
قمارينا وحسيس القوق
رَحَْلْ كل البلد وياك ..
نزلْ جوَاك حنين وسكْن
وانا الكاتلني من يوم داك
علي عينيك عيوني بكن
أقالد ذكرتك جواي ..
وأعيش باقي العُمُر رحّاااال
سلامات وين نزل محياك
تحياتنا وأمانينا

قمر باهر أماسينا
تبل شوق البلد ترتاح
علي نمّك غناوينا
"لدايات" شايك الرماي
مزاجات قهوتك جوّاي
أحاسيس فيني تتحكر
جمال نيلنا وعصارينا
نضاريك في العيون تظهر
بريق لهفة ودمع هطّال...أكيد باكر نجي ونلقاك
ريق لهفة ودمع هطّال...أكيد باكر نجي ونلقاك
(5)
جمال بابل
كلمات محمد سفله
غناء جعفر السقيد

اشبه ذاتي بي ذاتك لقيتك انا
لقيت نفسي وعشقتك زي تراب وطني
ونقشتك فوق جدار الليل
همسة شوق ملبده في دموع شجني
لما رحلت في عينيك اهازيج غنوة التذكار
وغفرتلك الاسي الجواي
ودبتا علي الوتر غنوه
اتوسد خيالي ونم سمعتك في الدليب والناي
تقوقي ضياعي للرحل شوفتك سالي شوقك سيف
تقطعي من لحم جلدك وتلتقي في جراح قلبي
اتمنيتي زات اللحظه اكون مارد اجيب عرشك
عرش بلقيس واجدد فيك اسطورة عصا موسي
ومالك الجن وامرقك من صدي التاريخ
جمال بابل من قلب الصدف دره
واحاوربك زمن اطرش منو العلمني
منو العلمني اتبسم وقت يصل الحزن حدو
منو العلمني اتشتت شعاع محبوبتي في كل الشوارع زي ضي
منو الخلد نجومو شتي في كل شئ زي النفس لا في المروق
لا في الدخول بنحسبو لكنو في عاين لي زين اشر علي واصل يقول
اقطع كلامو قبل يتم اسوقك امش اخاف اجري اكل
اقعد واقنب بالتعب الهث واتمدد بلا احراج وبي يصل الحذن حدو
والاقيك بي حرف بكاي ...الميس بعيد الليل دخل
دسيني من الظلمه فيك لميني ساعة الهجعه بيك
قبال يسابقنا الزمن ويلحق يكـــتل فينا صفقات الخريف
موعد غناوينا الزمان تصبح خيال يتجادعا الموج
وترسي في وادي الضياع من غير ا نبقي مشردين
(6)
ســـــــــــــــــــــافر
كلمات الفاتح إبراهيم بشير
غناء/ جعفر السقيد

عليك الله سافرعليك الله شيل الأمانى معاك
وشوف البيبكى عليك أو حتى يترجاك
أنا تعبتا خلاص من جورك انت على
تزعل بدون اسباب ومن تانى ترجع لى
خليك معاى واضح لا يبقى قولك نى
يا انت ابقى معاى يا انتى ماليك بى
رغم الحصل والكان ياما صبرتا عليك
كان العشم جواى تصدق معاى عينيك
لكن غرورك فاض كتل البراءة الفيك
خلاك تقول مجبور أنا بكره برجع ليك
اوعك تظن فى يوم أنا قلبى برض الذل
او يستكين هيمان ويرجاك عند الضل
انت الفتحت الباب وقت للخصام ادخل
وانت الزرعتا الشوك وقلعت شجر الفل
أنا فى النهاية إنسان مرهف رقيق حساس
وداير اعيش فى امان واصافى كل الناس
لكن إذا جاء الريد فوق الكرامه وداس
مجبور اقول القول القالوا (بوفراس)
فى شعروا قالوا كلام مدهش جميل يسبى
لا تملك الحسناء مهما تكون قلبى
أنا برضى زيو كمان أعلنت لى حربى
وعايش قليبى بقول يا اخوانا آيه ذنبى
والله يا المريود خليتنى فيك محتار
مرات بشوفك نور مرات بحسك نار
مرسالى وكتين جاك قابلتو باستهتار
وما تنسي أى حريق دائماً بدايتو شرار
يا قلبى اصبر اصلو الظروف قاصداك
معليش إذا جاء الليل وخيم على دنياك
عذراً إذا الأحلام اكبر من الإدراك
وعفواً اذا حبيت زول ماعرف معناك
(7)
عشان خاطر عيونك

عشان خاطر عيونك ديل افارق حلتي ووطني
اسافر من بلاد لي بلاد كمل صبري وراح بدني
اضوق المرة واتغرب واكون مجبور اشد رحلي
وافوت ناسا حنان طيبين واقوت مرتع صباي واهلي
اشيل الزاد غنيواتن اردد فيها من جهلي
كلامه يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرته عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه زاته نضال






(
عم عبد الرحيم
كلمات : محمد الحسن سالم حميد
غناء مصطفى سيد أحمد


فتاح يا عليم .. رزاق يا كريم ..
صلى على عجل ..
همهم .. همهمة ..
حصن للعباد ... وهوزز سبحتو
ودنقر للتراب .. هم فوق همهمة ..
صنقع للسما ..
وكان في الجو في غيم ..
وكم نجمات بُعاد ..
وكان الدنيا صيف ..
لا قالتلو كيف ..
كيف أصبحت كيف ..
لا لمسة حنان .. لا لمسة وداد ..
لا رمشة طريف من قلباً وفي ..
زي أيام زمان ..
أيام الدفي ..
وكانت ماها في .. كانت في المراح ..
شدتلو الحمار ..
تحلب في الغنم لي شاي الصباح ..
والطير ما نضم ... ما رسل نغم ..
عم عبد الرحيم أتوكل نزل ..
في المشرع لقى .. زملان الشقى
الجاء من الجريف .. الجاء من الجبل
عل الناس بخير ..
صبح هاظرم
نقنق ناقرم ..
غاظوه ونعل
وعم عبد الرحيم ما يخبر زعل ..
كل الناس هنا ما بتخبر زعل ..
تزعل من منو .. وتزعل في شِنو ..
كل الناس هنا .. كل الناس صحاب ..كل الناس أهل
والماهم قراب .. قربم العمل ..

الطاق اليطق عشت أبو الزمل ..
بالحالة العليك بالفال بالأمل ..
عم عبد الرحيم كُت فلاح في يوم ..
في أيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار لا بدوم ...

وعم عبد الرحيم ماشي على الشغل ..
في البال القديم
إتعارض تُكل ..
تنشايح جراح يا 000..
كيف الغسل ..
الدِنيا أم صلاح .. تبدأ من التُكل ..
في حق الملاح .. في اللبس الجديد ..
في القص القديم .. وبيناتن عشم ..
في الفرج البعيد ..
أمونه الصباح قالتلو النعال ..
والطِرق إنهرن ..ما قالتلو جيب
شيلن يا الحبيب .. غشهن النقُلتي والترزي القريب
بس يا أم الحسن ..
طقهن لا بفيد ....
إنطقن زمن ..
وإنطق الزمن لازمك توب جديد ..
وبأياً تمن ..
غصباً للظروف والحال الحرن ..
شان يا أم الرحوم .. ما تنكسفي يوم
لو جارتنا جن .. مارقات لي صفاح
أو بيريك نجاح .. ده الواجب إذن
وإيه الدنيا غير .. لمت ناس في خير
أو ساعة حزن ..

عم عبد الرحيم يا حر ..
ات ماك حر ..
ياريت التمر ياريت لو يشيل كل تلات اشر ..
ولا أيام زمان كانت ما بتمر ..
كان ما جاك هوان وما لاقاك ضر ..
كان لا ضقتي ضيق لا اتغرغر صبر ..
لا شابيت غريق لا طوح فقر ..
وكان ما كان ... وكان اكسيكي در ..
والماهية أُف .. عيشة هاك وكُف
في هذا الزمن .. تُف يا دنيا تُف
يا العبد الشقي .. ما إتعود شكِي
لكن الكفاف فوقك مُنتكي
والسوق فيك يسوق ..حالك ما بتسر ..
إلا كمان في ناس فايتاك بالصبر ..
ساكنين بالإيجار لا طين لا تمر ..
واحدين بالإيجار ما لاقين جُحر ..
سلعتم الضراع والعرق اليخر ..
عمال المدن .. كلات المواني ..
الغبش التعاني ..
بحارة السفن .. حشاشة القِصون ..
لقاطة القطن .. الجالب الحُبال
الفِطن الفرن .. الشغلانتو نار ..
والجو كيف سُخن ..
فرقاً شتى بين .. ناساً عيشا دين ..
مجرورة وتجر ..
تقدح بالأجر .. ومرة بلا أجر ..
عيشن كم هو .. وديشن هانقدر ..
وناساً حاله زين ..
مصنع .. مصنعين ..
طين في طين وين ..
ما مرابه مُر ..
بارد همها .. لا يعرق جبين ..
لا وشاً يصُر ..
عين والله عين ..
كلها كمها .. وعزها هان قدر ..
في الجنة أم نعيم .. في الجنة أم قصُر ..
يا عبد الرحيم إلا وراء القبر ..
ويُلكز في الحُمار .. لا تسرح كُتر
فتاح يا عليم ..
وإن كان القفر يا عبد الرحيم ..
أشبه بالكفر ..
حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
هِم يا الفنجري .. يالجرف الصبور ..
كل السمتو مات .. باقي على التمور
وأرضك راقدي بُور ..
لا تيراب وصل .. لا بابور يدور
ونقرط للحمار .. نقريطة الحمار
لا تنسى النعال ..
الطِرقي .. الخضار .. اللبس الجديد
تسريح السفر للماشي الصعيد .. ماشي الديش نفر
والبال إشتغل .. والبال إشتعل بالآبى ما يعيد
الحول ما إشتغل ..
الغُبن الشديد .. السابا ورحل ..
الضيق المحل .. والفرج القريب ..
الجاء وما وصل ..
زي الحال ده يوم لا كان لا حصل .. والبال إشتغل

السكة الحديد يا عمو القطر ..
يا عبد الرحيم قدامك قطر ..
وسال الدم مطر ..
وطارت دمعتين ..وإنشايح وتر
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين بوّخ وإنتشر ..
أطفال القرى وعمال الحضر ..
أدوه الطيور ودنو البحر ..
إنصاعد سحاب وإندافق مطر ..
عم عبد الرحيم في الشارع عَصر ..
لي تاله اليسار متفادي الكجر ..
دورية الكجر .. عربية الكجر ..
جفلت الحمار وطوّح زي حجر ..
وعم عبد الرحيم إتلافا القطر ..
فتاح يا عليم .. سال الدم مطر ..
جرتق للتراب .. منشور بي كتاب ..
روشتة وجواب .. وماهية شهر ..
مفتاح آب غراب .. أورنيكين سهر ..
جنب لبدة حمار مقطوعين ضهر ..
عم عبد الرحيم يا كمين بشر ..
صحي الموت سلام ..
ما يغشاك شر 00000


(9)

قبله غناي
إحترتُّ كيفن أوصفك والله يا قِبلة غُناي
لو كان بحور الكون مداد بتجف قبل ما تنصفك

حاولت أكتب فيك وأقول وأوصف ملامحك بالشعر
لكن حروفي تذوب عديل قدام عيونك تنصهر
يا عايشة في دمي وغناي يا ديدن الروح والفكر
خلدت إسمك بي حروف قطرات دماي كانت حِبر
*******************************
يا غُنوة في وتري الحزين يا ضحكة في الزمن الصعب
يا واحة في عِز الهجير يا راحة من بعد التعب
يا نسمة هبت في الدغيش عزفت علي وتر العصب
يا رحمة من رب العباد مكبوبة فوق خلق الله كب
*******************************
سافرت في عينيك سنين زادي المعاي أبيات غُنا
مكتوبة بي دمي الصِبح شلال من الهم والعنا
صورت إحساسي الدفين بي قافية ليكِ معنونة
بتقول بلا كلفة ورتوش يا إنتِ يا الموت والفنى
*******************************
إحترت في وصفك أنا وحارت معاي كل الحروف
مرات بشوفك ضي أمل درّج خطاي رغم الظروف
مرات بشوفكِ جارية نيل أمواجو عانقت الجروف
والله يا قبلة غُناي.. إحترت كيفن أوصفك

(10)
لاتــــنـدمــــــــــــــي

لاتدمي خيراً كتير مبعوث إليك ماكنت بيهو بتحلمي
إدفق العيش الكتير وأصبحتي فيو تخمخمي
خليتي حبات للرمال أرجوك لاتتألمي
رب العباد قاسم رزق تديهو من غير تعلمي
لاتندمي
عارف وراك أطفال صغار تعبانة فيهم تطعمي
تعبانة بالليل والنهار في لقمة لقمة تلملمي
نعم الظرف قاسية وصعيبة ومابدور تستسلمي
لكن بقولك أصبري وبكرة الصبر ياغالية منو بتنعمي
لاتندمي
زي ماوراك أطفال صغار تعبانة فيهم تطعمي
حتي الحمام عندو الصغارراجيك مرة تلقمي
مكتوبلو يأكل من إيديك تديهو منك تقسمي
كان بي رضاك أو غير رضاك في رزقو ماب تتحكمي
لاتندمي
دي حكمة من رب العباد سراً غميس ماب تفهمي
أجوك بس طاوعي الظروف ومن الزمان إتعلمي
وتأكدي إنو الرزق من الله ما من آدمـــــــــــي

(11)
معزور لو قلبي اشتهاك
للشاعرعوض على حامد
غناء ودالنصري

معذور لو قلبي اشتهاك
ما إنت عارف فرقتك ما بيحملا القلب الهواك …
معذور…

دا مناه يوم ما نتفرق يا ريتو كان يفضل معاك
لو بي مرادو يقوم يجيك تلقاه بين ايديك حداك
متمني ألحق بيك سريع نتلاقى والأشواق هناك
جاييك هارب من سنين جاييك واقع في حواك
غلبو النواح يوم فُرقتك بالدهشة خانس إتعبر
ما بين نوازع الروح إليك هايم وبين حُكم القدر
ما اتزعزع الإيمان جواه ولكنو في الآخر بشر
قايل عليك شدة وتزول ما قايلك إنت علي سفر
ما كان هو فاهم يومو داك إيه ضحكة البرق اللصف
ولا كان هو شايف للهموم الجاية واقفات ليهو صف
ولا كان هو حاسس بالغرام الباني في الغيم إتنسف
لقى نفسو فجأة بلا وجيع مفجوع ومفقوع بالأسف
يا ريتو كان وقف الزمان قبال تروح صدَّ ورجع
ما كان غشانا الحزن يوم لا فُرقة بيناتنا بتقع
كان لا رثيتك لا بكيت لا قلبي فيك يوم إتفجع
وما كان قدر ذكراك صِبح يومها التزور مُره ووجع
معذور
(12)
يانسمة مين غيرك

يانسمه مين غيرك يكسر حواجز البين
يتحفني بي اخبار مريودي نور العين
طولته مستني يكتبلي لو سطرين
يحكيلي كيف حالو وان شاء الله هو زين
مفروض يكاتبني مهما اكون انا وين
حسب اتفاقنا الكان يوم كنا متفارقين
رسلته مكتوبين ما جاتني أي ردود
ان شاء الله مانعو هو خير لا يبقى صد وجحود
يا حليلي انا الممكون وصابر على ناري
وكل ما ادس حزني تفضحني اشعاري
وكل العلي والبي اسبابو من جاري
ويومي الاقصر انا ما بيقبل اعزاري
يا نسمه قوليلو الحال وراك مايل
والليل بلاك ليلين وديمه الدمع سايل
قوليلو يومك داك يومي البقيت راحل
ماقلت لي الرد ما تشيلو هم واصل
يا نسمه عارفاني مكتول ضناني الشوق
للبلد من جم صلحاب كري والسوق
عمرابنا والقوزين ليهن سلام مطبوق
خاصه المحطه تحت وقز ام شديرة الفوق
شوق البلد جواي يا نسمه ازاني عديل
خلاني ابكي وانوح كل ما اشوف النيل
اطرى الجروف والناس تنزل دموعي تسيل
يمارى لي منظر منقه و قرين ونخيل
يا نسمه شفتي البي وتابعتي بالتفصيل
ارجوكي سافري خلاص واوعك من التاجيل
برجاكي فوق نارين حزني وظلام الليل
وبصبر لي يوم يومين فيها الله بيه كفيل

(13)
خاتم المني

الـدنـيـا صـح فراقه لكن القلوب يا الدنيا ما داكي الامان
وعــشــــم الـــمـــســافــريــن الـرجـوع ولـو مــــا كدي
مــاكــــــــــــــــان فـي زول فــــــــــــــــــــــات المكان
وانــا لـي حــبــيـــب يـــوم دار يـــســـيــــــــب قـال لي
قـــــريــــب بــــرجــــــع عــــشــــان نـــبــــنـي البيوت
نــرســــم خـــطــــوط الـــضـــو عــلـي طــــول المكان
يــــــــــــــا الله ويــــــــــــــــن خـــــاتـــــــــــــــم المني
في رمــشــة الـعــيــن الـلـبـت بـالـشـوق تـنوم القاك هنا
ارقـد عـلي حـضــنـك انـوم تـمـــلانـي ريــد امـلاك غنا
ما انـتـي يـا بـحـر الـشـعـاع الـشـمـسـو غـابـت مـن سنه
لــسـه بـيـغـسـل قـلــبي نـور يـشـرقـنـي يـا ضـي الـهـنـا
يـا الـــقـــمــره ويـــن الــســنــسـنـه لا حــتـي فـي طرق
الــــشـــعـــــــــــاع الـــمـــــــــن زمــــــان فــوقــــك بنا
هـي اقـلـبي الــصــفــحــه الـعـلـي الـــســمـــاء مـن هناك
مـادام هـنـا زولـي الـبدي الدنيا نور ضلم رحيلوا الامكنه
تراهو زي ما الطيف يمر الليل يمر اليوم يمر والعام يمر
وانـا فـي الــدريــب الــفــتـا بـيـهــو ألـم اتر قدمك واصر
ارجـي الـمـسـافـريـن وانـشـدن هـوي في المدن ما شفتوا
زول شــــــــــــــايــل بـــشـــــــــــــاشــــــــــــــات الفجر
مــزج الـصـبـاحـات بـالـمـغـيـب لون خدودوا من العصر
وآه يــا بـيـوت لا دقـه بــاب لا فــات حـيـطـنـا العنكبوت
وانــــا لـــســه راقــــد فـي الــرصــــيـــــــــــــف راجيك
تــقـــيـــــــــف قــــــــدامــي قـــــــــبـــال مـــــــــا اموت
دنـــيــا مــن بـعــدك يــبــاس يــنـشرا في الوديان سكوت
يــا الله يــوم كــدي بـــالــنـــهـــار فــرح الـمواسم نفرعوا
صــوت الــقــطـارت مـن بـعـيــد فوق الـفـلـنكات نسمعوا
اشــواقــنـا والـنـاس الــزمـان وكــل الـمـسـافرين يرجعوا
الـمـح حـبـيـبي انـا مـن بـعـيـد يـهــجــم قـلـيـبـي ويقطعوا
حـزن الـسـنـيـن الـفـيـنـا سـاد انــا وانـتي سـوا سوا نقلعوا

(14)
الضرب فوق الميت
كلمات محمد سفله
غناء النصري

إعدت الجراح ياغالية ما عاد البشوفو جديد
ومابشعر بقيت بالطعنه مهما كان مداها بعيد
واحد عندى كان الامى تنقص واللا تنى تزيد
واللا أصبح ملاقى مأسى واللا يطل على العيد
ماهو غريب عليها الدنيا تقصد قلبى بالتحديد
ودون الناس براى ياحلوة ابقه عدوها انا الويحيد
يانى صريعه من شبيت فوق مهد الطفولة وليد
ولم كبرته واترعرعت فى دنيا الغرام والريد
من نار العذاب الضوقتو لو ماكنت زول صنديد
كان فى قبرى بدرى رقدت فى جوف ود أحدو شهيد
إلا هواك ملانى عزيمه آه يابلبلى الغريد
بلقاك والمحن حابكانى دايماً ليه مادى الليد
الا الليله عاد فى الغربه نازف قلبى دمو صديد
والموت قبل أجيك صدقنى ياهو مصيرى تانى أكيد
الشقى فيها أمسى غرينى والقيد فى خطاى حديد
والشوق بى لهيبو ونارو يلعب فى حشاى عربيد
فى ركن السجون اتباكه أرزح فى الظلام والقيد
وخايف تبقى فيها اقدارى حاكمه على بالتأبيد
لويجدى الشعر ادمنتو كم سطرت فيهو قصيد
وترجمت العليا أغانى لو قول الشعر بيفيد
لو عش فى الجنان يابوحه غيرك ماحأبقى سعيد
ودونك لو هدولى ثماره برضىء أشوفه مره شديد
(15)
الطمبور

الطمبور صديقنا وعزنا وملجانا
وكتين السنين تفتح بوابة أحزانا
مما قمنا نسمع فيهو لا ملينا لا ملانا
زي إبل الرحيل شايلي السٌقا وعطشانه
أوتارو الحنيني تملِّي عايشي معانا
في الريف والحضر ومحل ما تمشي خطانا
الله لو بشيشي تداعبو إيد فنانة
تتراقص جميع الدنيا بي أركانا
لو قلبك حجر وغنانا شايفو رطانه
أول ما يرن تلقاك طربتا معانا
إحساسك يذوب قامتك تميل طربانه
زي مرّ النسيم وكتين يداعب البانه
الطمبور سماحتو القمرة مالي سمانا
الليل والسكون والرملة كالمرجانه
نتلملم نكون في شلة زاهية الوانا
نضحك ننبسط لما الصباح يلقانا
وفي رواية اخرى معروف من قديم
انو الجمال نسبي وللموجب دوام لابد من سلبي
لكن نتفق رسمي وكمان شعبي
الطمبور علاج لكل مرض عصبي

خلا قدح حراز دبكر أصيل عربي
ومكسي جلد بقر يلصف تقول دهبي
فوقو تلات عصي واقفات بلا شعبي
وخمسه سلوك سونان موزوني بالنسبي
لو رنت تذوب ترقص جبال كجبي
والبركل يمور يتحول العقبي
ولو ما كت بخاف والناس تشيل كضبي
كنت بقول يرن تنحلا لوكربي
وأنداح الوئام بين الخلق يدبي
والبوسني الجريح يستأمن الصربي
وينشر الفرح من راجا لاوربي