من روائع الحلنقي

(1)
أمرك يا قدر
مشي امرك ياقدر انت احكامك مطاعه
لوحصل نحن افترقنا والليالي الهم اضاعا
همسة الذكرى المعاي تبقى زاد روحي ومتاعا
ــــــــــــــــــــــــــــــــــــــــــــــــــ ـــــــ
الزمن كان مبتسم والليالي جميله حالمه
كانت الايام بتمضي حلوه ريانه ومسالمه
لا اشتكينا من الزمن لا لا التقينا في لحظه ظالمه
بي حنانا الدنيا كانت ياحبيب العمر عالمه
ــــــــــــــــــــــــــــــــــــــــــــــــــ ـــــــ
فجأه من غير نحن نشعر يافراق طليت علينا
واصبحت كل الليالي الطيبه والايام حزينه
وارتيم ظل في جبين ايامنا ظل آهات سجينه
كان طريق مكتوب نسيرو نحن سرناهو ومشينا
ــــــــــــــــــــــــــــــــــــــــــــــــــ ـــــــ
عدت من بعدك رجعت عشت متغرب وحيد
وابتديت اشعر بزهر العمر يتساقط بعيد
ياحليلك انت والايام ربيع اخضر سعيد
كنت ببكي عليك بعمري والدموع بس ما بتفيد





(2)
فايت مروح وين
فايت مروح وين وين ما لسه الزمن بدري
خليك شوية معاى عشان جنبك يطول عمري
دار الفرح والريد تلقانى من اهلا
لى الما بيعرف طيبة شباب كسلا
بين الضفائر بان وجه القمر طلا
وكيف قلبى يتصبر صبرنى يا الله
فايت مروح وين
يا اجمل الحلوين يا احلى ياسمينا
ما لينا غيرك اهل انت الاهل لينا
لمتين مراكبنا ترسى وترسينا
على وادى اسمو القاش والغيم حوالينا
على نسمتك يا قاش بالريد تعدينا
فايت مروح وين
باقى الجميل تموا اصلو العمر مرّ
وانا كم صبرتا معاك فى الحلوة والمرة
اطرح جبينك لى خليهو ينفرّ
وانت البيدور ضرك انشاء الله ينضرّ
فايت مروح وين
يلاك بعيد نرحل على دنيا حنية
نعيش لوحدينا والسيرة منسية
واوسدك قلبى وارعاك بعينيا
واسقيك مياه توتيل عشان تعود ليا
فايت مروح وين سايبنى رايح وين
لسه الوكت بدرى
خليك شوية عشان جنبك يطول عمرى
عارف الولف كتال وانا قلتا عزرى
وارحم بخاطرى انا ارحم تعب قلبى


(3)
بتتعلم من الأيام

بتتعلم من الايام مصيرك بكره تتعلم
وتعرف كيف يكون الريد وليه الناس
ليه ليه بتتــــالـــم
متين عرف الهوى قلبك
متين فاضت بااهات متين سهر
عيونك ليل طويله ساعات
وحاتك لسه مابتقدر تقاسم قلبى دقاتو
اقابلك وكلى حنيه واخاف من نظرتك لليا
واخاف شوق العمر كلو يفاجئك يوم فى عينيه
ورى البسمات كتمت دموع وبكيت من غير تحس بيا
وبكره وبكره الريد الريد بدون مواعيد يزورك
ياحياة عمرى وتقول ياريتنى لو حبيت
زمان من بدرى
وتعال تعال تعال فرح ليالينا وتعال قبل
السنين تجــــرى

(4)
غربه وشوق
جيناكم يا حبايبنا
بعد غربة و شوق
نغالب فيه ويغالبنا
ونكتم أهة
تظهر أهة
تتعبنا
حنين لشوفة الغالين
مدوبنا

هناك ما هنتنا يا حلوين
الهم بدل واحد يبين همين
وفيها قلوبنا
تتأوه ونتاوه
سنين وسنين
مصيره الحى يلاقى حبايبه
لو صادقين

سماع أهلا
من الاحباب شروق أمال
ووصف البهجة بالكلمات
محال يتقال
حلاوة العودة
غنيناها فى موال
تحكى عن الولف
واصلة الولف كتال

(5)
أعز الناس

يا أعز الناس حبايبك نحن
زدنا قليل حنان
دا العمر زادت غلاوتو معاك
وصالحني الزمان
يا أحن الناس حنان

كنت من قبلك
بشيل الليل دموع
واطويه هم
انا كنت بخشى
على الأماني الطفلة
يفنيها العدم
وجيت لقيتك بين قلبي دموع
وغنيتك نغم

يا حبيب
ورد الأماني
الفي أعماقي فتح
وابتدا القلب
العاش العمر في آهاتو
يفرح
والزمن ماظنو بعدك انت
يرجع تاني يجرح

نامت أحزان عمري
غنى زماني
واتلاشت صعاب
أنا قبلك الأيام
قضيتا سراب
يسلمني السراب
وبيك طويت من عمري
صفحة ماضي مكتوب بالعذاب

(6)
قطر الندي
الريد جو قلبي بحبك بدا
ياطيبة حياتي يا قطر الندي
ما كان في خيالي تتنكر كدا
أيامن الجميلة ليه بتنكدا
جربت هواهم
قليبي انكوى
تاريهم جاروا
وماصانو الهوى
حاولت اسيبك واتناسى المضى
أيامك معاي ساعات الرضى
المكتوب علي أنا قلبي ارتضى
ياريت الليالي عطفو يعوضا
جربت هواهم
قليبي انكوى
تاريهم جارو
وماصانو الهوى
الكلمة الحنينة مشتاق اسمعا
روحي خلاص جفيتا والشوق لوعا
الدمعات
عيوني كيفن تمنعا
وانا شايف سنيني جورك ضيعا
جربت هواهم
قليبي انكوى
تاريهم جاروا
وماصانو الهوى
يومي الشفتك انت حسيت بالهنا
طويت يا حياتي شمعاتي انا
بعد الحب دا كلو يا أجمل منى
لي بكيتني تاني عاودت الضنا
جربت هواهم
قليبي انكوى
تاريهم جاروا
وماصانو الهوى


(7)
أقابلك
أقابلك
في زمن ماشي
وزمن جاي
وزمن لسة
بشوف الماضي فيك باكر
أريت باكر يكون هسة

وقصر طول مشاويرنا
ورقش بالفرح جلسة على النيل
والقمر مرات يبين في الموج ويدسة
ونحن نقابلو زي طفلين
كلامم كلو بالهمسة
وزي عصفورة قلبها دابو حنة
وبالولف حسَّ

أي عيون بتتقابل
إلا عينيكي ما بتتفات
في عينيك بتوه
كيفن في حلاة البسمة في القاسيات
وعطر الصندل المستني
يفرح بيكي فرحتو جات
وحاتك خلي منو شوية
شان يتكاحل السمحات

بلاك النجمة
لا بتتعلا لا بتتدلا
فوقا هلال
عليكي الريدة طلي علينا
يالختينا فيكي آمال
تجينا فرح ترفرفي فوقنا
نستناكي بالموال
والشوق بيني بينك انتي
زي ماتقول نظرة طال

(
أعذريني

أعذريني الدمعة ديّه...حتبقى آخر دمعة ليّه....
تاني لو قربت منك.....يبقى ليك الحق عليّ....

أعذريني محال أعاود....تاني ريدتك وأمشي ليها..
ولا أرحل في عيونك....والطفولة الضاجّة فيها....
كيفك أريدك وانتي أصلك....ريدتي ما حسيتي بيها..
بالبعاد ما تعذبيني......أعذريني وأعذريني.....

ما قدرت مرة واحدة......بالغلط أغلط عليك.....
وانتي عمرك كلو ظالمة.....والدليل غفراني ليك...
عارفو قلبك ما معاي.....برضي شاغل قلبي بيك.....
بالحنان ما تعشميني......أعذريني وأعذريني.....

من زمان وأنا راجي منك....كلمة بيها تفرحيني.....
وانتي ما فرحت قلبي......كنت ديمة تجرحيني......
قسمة الزول ما بتفوتو....والبجيني معاك بجيني....
لو بكت منك عيوني......سامحيها وأعذريني

(9)
عصافير الخريف
هـجرة عـصافير الـخريف
فـى مـوسم الـشوق الحلو
هـيج رحـيلا مـع الـغروب
احـساس غـلبنى اتـحملو
وكتمت اشواق الحنـيـن
داير الدموع يتـقـلـو
ورجعـت خليت الـدموع
يـنسابو ..مـنى ويـنزلو
ليـه يا عصافيـر الخريف
خضرة مـشاعـرى اشيلا صيف

تـحت الـغمام شـايف
مـواكب الـهجرة اتـلاشت سراع
ليه يـا عـصافير ليه الاسف
مين علمك أسف الوداع
وعارف دا ما اول سفر
لبلاد بـعيدة بـدون مـتاع
زى ما بتخافي مـن الرياح
بنخاف كمان انحن الضياع
ليه يا عصافير ليه الضنى
صفقة جناحك احزنها

غـايـب الـسنين الـليله
مالو غنا العصافير غـلبو
طراهو زولا كان ولوف
كم رضا خاطرو وطيبو
سمع قليبو كـلام حـنين
هـدهد مـشاعرو ودوبـو
الـناس سعيدم فى الـحياة
لا ضاق فراق لا جربو
وانا حالى فى بعد الوطن
دفـعنى ضي العين تمن

(10)
بساط الريح

بساط الريح بجيني متين
أغمض عين وأفتح عين
أكون جالس مع الطيبين هناك في مقرن النيلين

ريجيتو يجيني ما جاني
تكون غلطة زمن جاني
حرمني أعود لأوطاني
ولا ظروف معاكساني
ولا يكون بساط الريح فقد في الجية عنواني
وبقيت محسوب من الضياعين

بساط الريح متين تظهر
يشيلني جناحك الأخضر
أشوف النيل بيتمختر
ألاقي عيون من الكوثر
أعود من تاني لي أهلي
وظروف العودة تتيسر
تقيف وتجف دموع العين

مشيت أسأل بساط الريح
شنو اللأخر معادو صحيح
أترجيتو يبقى صريح
يوري حكايتو دون تلميح
شنو الخلاهو يتأخر !!
حلف انو المطر والريح جارو عليهو مجتمعين


(11)
دعوه المظلوم


كنتا و انتا معاي بتحلف

انو شكل الدنيا تاني

فجأءة جات القسوة منك

زودت قسوة زماني

اوعى ما تقول لي زمننا

هو اللي ظالم

و هو اللي جاني

الزمن مظلوم معانا

في الدقايق و في الثواني

و انتا يا ريت يا وحيدي

تفضى ليهو و دمعة حبيبك

كنتا ما بتحمل تفارق

او تكون الفرقة لمحة

كنا حلوين يا حبيبي

كانت ايامنا سمحة

السماحة الفي عيونك

كنتا بيها بنوم و بصحى

و أي فرحة بدونك انتا

عمري ما حسيتا فرحة

غايتو صابر لليالي

لو تحن في يوم تعيدك

وانتا ظلمك ما بفيدك

دعوة المظلوم بتوصل

انتا ظلمك ما بفيدك

كيف يهون الريد عليك

و تظلم الزول البريدك

وانتا ظلمك ما بفيدك