من اجمل ما قيل عن الحب

أنساك ولا تاني أريدك

لي الليلة القرار في إيدك
* * *

وذي ما إنت ياكا أميري
برضي انا بالمشاعر سيدك

ولي الليلة القرار في ايدك

* * *

الزول البريد ما بقوى قدام دمعة من مريودو
وكل الدنيا عنده ماااا بتسوى أكثر من جفاهو ووجودو
من وين إنت جبته القسوه والقلب اللي بينسى عهودو
وإتنكرت للبعمره ضحى عشان تقوله وحيدك
لي الليلة القرار في إيدك
* * *

الريد ماهو نشوة سكرى في لحظة تلاقي حميمه
والريد يبقى ليك بالفطرة في قلب البريدك قيمة
سروا كما تكون الذكرى ماليا خيال خيالك ديمة
وأشواق في خيالها جحيمه من نار البصيبني يصيبك

ولي الليلة القرار في إيدك

* * *

شايلك في الدواخل هيبة أكبر من حنين أشواقي
ومن شدة مشاعري الطيبة حتى فراقنا شايفوا تلاقي
ما قايل معاك الخيبة بيها بتتختم أوراقي
منك قلب ينزف تاني ... لكن كل مشاعري تريدك
ولي الليلة القرار في إيدك

* * *

وقادر برضو الملم نفسي بالقلب المعاك أزاني
وأشرع في الرحيل من هسع من جنة هواك يا جاني
وإتحداك يلاقيك حسي في زولاً يريدك تاني
ولو فكرت ترجع لي ما تعشم قليبي يعيدك


ولي الليلة القرار في إيدك
* * *

وأهون من غرورك قلبي يختار الضياع والحرقة
وأرحم يتحرق بي حبي بعدك دون مشاعر ابقى
يا تختار تفارق دربي ويبقى مناي وراي ما تشقى
ويا تختارني طائع راضي في الريد والمحبة نديدك
و لي الليله القرار في ايدك